गण्डकी प्रदेश सभा सदस्यको निर्वाचनका लागि समानुपातिकतर्फ दलहरूले पेस गरेको बन्दसूचीबाट २२ जनाको नाम हटाएको हो । गण्डकी प्रदेश सभाका लागि समानुपातिकतर्फ ३१ दलले पेश गरेको बन्दसूचीमा नाम समावेश ३ सय ६८ मध्ये तोकिएको जरिवाना समयमा नबुझाउने र अन्य अयोग्यता भएका २२ जनाको नाम निर्वाचन आयोगले हटाएको हो ।
उम्मेदवारका सम्बन्धमा परेको दाबी विरोधउपर जाँचबुझ गरी उम्मेदवारको नाम सम्बन्धित दलले पेश गरेको बन्दसूचीबाट उमेर नपुगेका ४ जनाको नाम सूचीबाट हटाएको छ । प्रदेश सभा सदस्य निर्वाचन ऐनमा सूचीमा पर्ने उम्मेदवारको उमेर २५ वर्ष पुग्नुपर्ने व्यवस्था छ तर सूचीमा परेका ४ जनाको उमेर २५ वर्ष नपुगेको भन्दै निर्वाचन आयोगले सूचीबाट हटाएको हो । जनमत पार्टीबाट समानुपातिक उम्मेदवार बनेकी सुस्मिता थापा, नेपाल जनता दलबाट उम्मेदवार बनेका देवकुमार परियार, मौलिक जरोकिलो पार्टीबाट उम्मेदवार बनेकी सुमित्रा परियार र लोकतान्त्रिक समाजवादी पार्टीबाट उम्मेदवार बनेकी संगिता बोहोराको नाम उमेर नपुगेको भन्दै हटाएको हो ।
गण्डकी प्रदेशका मतदाता नभएका २ जना जनता समाजवादी पार्टी नेपालका भीमबहादुर मग्राती र नेपाली कांग्रेस (विपि) का पुनम तुलाचनको नाम सम्बन्धित प्रदेशका मतदाता नभएका भन्दै हटाउने निर्णय गरेको हो । प्रदेश सभा सदस्य निर्वाचन ऐनमा प्रदेशसभामा समानुपातिक वा प्रत्यक्षतर्फ उम्मेदवार बन्न सम्बन्धित प्रदेशभित्रको गाउँपालिका वा नगरपालिकाको मतदाता नामावलीमा नाम समावेश भएको हुनुपर्ने व्यवस्था छ ।
निर्वाचन आयोगले आयोगबाट लागेको जरिवाना नबुझाएका १५ जनाको नाम बन्द सूचिबाट हटाउने निर्णय गरेको हो । स्थानीय तहका निर्वाचनमा उम्मेदवार बनेका र समय निर्वाचन खर्च नबुझाएकालाई निर्वाचन आयोगले जरिवाना गरेको थियो । सोही जरिवाना नबुझाएका १५ जनाको नाम निर्वाचन आयोगले समानुपातिक बन्द सूचीबाट हटाएको हो ।
निर्वाचन आयोगले गण्डकी प्रदेश सभाका २२ सहित देशैभरबाट ५ सय ५० जनाको नाम समानुपातिक बन्द सूचीबाट हटाउने निर्णय गरेको छ । आसन्न प्रतिनिधिसभा र प्रदेशसभा निर्वाचनको समानुपातिक निर्वाचन प्रणालीमा भाग लिनका लागि पेस भएको बन्द सूचीबाट उनीहरुको नाम हटाइएको हो ।
समानुपातिकतर्फ देशैबाट दलहरूले पेस गरेको बन्दसूचीमा नाम समावेश भएका ६ हजार ४ सय ५७ उम्मेदवारमध्ये निर्वाचन कानुन र निर्वाचन आचारसंहिताबमोजिम तोकिएको जरिवाना नबुझाउने ३ सय ६९ सहित उम्मेदवारको नाम बन्दसूचीबाट हटाउने निर्णय गरेको हो ।
निर्वाचन आयोगमा समानुपातिक विषय हेर्ने सहसचिव गुरु वाग्ले पार्टीहरुले उमेरसमेत नहेरी उम्मेदवारी दर्ता गराएको बताए । उनले भने, ‘कतिसम्म भने पुरुषलाई महिलातर्फको उम्मेदवार पनि बनाए, तिनीहरुको उम्मेदवार खारेज गरियो ।’
