१३ चैत, । काठमाडौंस्थित त्रिचन्द्र क्याम्पसमा स्ववियु चुनाव फेरी पनि स्थगित भएको छ । यसअघि ५ चैतमा चुनाव हुन नसकेपछि १३ गतेका लागि तोकिएको थियो ।
तर निर्वाचन समितिले मंगलबार राति सूचना जारी गरी विद्यार्थीको तालाबन्दीका कारण चुनाव स्थगित गरिएको जनाएको छ । ‘मतदानका लागि वातावरण सहज नदेखिएको र केही विद्यार्थीले क्याम्पसको मुख्य द्वारमा पुनः तालाबन्दी गरेकाले’ अनिश्चितकालका लागि निर्वाचन स्थगित गरिएको समितीले उल्लेख गरेकाे छ ।
‘त्रि.वि. केन्द्रीय कार्यालय तथा अन्य सम्बद्ध पक्षसँगको परामर्शपछि मतदानको मिति र समय तोकी अर्को सूचना प्रकाशन गर्ने गरी चैत्र १३ मा तोकिएको स्वतन्त्र विद्यार्थी युनियनको निर्वाचनको मतदान कार्य स्थगित गरिएको छ,’ समितिले जारी गरेको सूचनामा लेखिएको छ ।
निर्वाचनको सम्पूर्ण तयारी हुँदाहुँदै पनि तालाबन्दीका कारण स्थगित गर्नुपरेको निर्वाचन अधिकृत डा. अङ्गदमणि गौतमले जारी गरेको सूचनामा उल्लेख छ ।
