पोखरा।गण्डकी प्रदेशको मुख्यमन्त्रीमा नेपाली कांग्रेसका सुरेन्द्रराज पाण्डे नियुक्त भएका छन् ।
सर्वोच्च अदालतको परमादेश अनुसार प्रदेश प्रमुख डिल्ली राज भट्टले संविधानको धारा १६८ को उपधारा ३ बमोजिम ठूलो दलको नेताका रुपमा पाण्डेलाई मुख्यमन्त्री नियुक्त गरेका हुन् ।
सोमबार सर्वोच्च अदालतले, मुख्यमन्त्री खगराज अधिकारीले लिएको विश्वासको मत बदर गर्दै उनी पदमुक्त हुने फैसला गर्दै नेपाली कांग्रेसका सुरेन्द्रराज पाण्डेलाई ४८ घण्टाभित्र मुख्यमन्त्री नियुक्त गर्न परमाआदेश गरेको थियो ।
नवनियुक्त मुख्यमन्त्री सुरेन्द्रराज पाण्डेले आजै पद तथा गोपनीयताको सपथ खाँदैछन् । प्रदेश प्रमुखको कार्यालयले दिएकाे जानकारी अनुसार आजै अपरान्ह ५ बजे न्यूराेड स्थित पोखरा सभागृहमा सपथ ग्रहण समारोह आयोजना गरिएको छ ।
