पोखरा। सिर्जनशील लोकतान्त्रिक प्रतिष्ठान पोखरा र गण्डकी वाङ्गय प्रतिष्ठान स्याङ्जाको संयुक्त आयोजनामा यही जेठ १५ गते मङ्गलवार स्याङ्जाको चापाकोटमा विविध कार्यक्रम सम्पन्न भएको छ ।
कार्यक्रममा प्राडा.शालिग्राम सुवेदीद्वारा प्रस्तुत अध्यात्म,धर्म र जीवन शीर्षकको छलफलपत्रमाथि अन्तरक्रियात्मक विचारगोष्ठीका साथै गण्डकी वाङ्मय दोस्रो अङ्कको लोकार्पण र विविध विधाका सिर्जना वाचन गरिएको थियो ।
कार्यक्रममा जगन्नाथ न्यौपानेको समूहले मिठो भजन प्रस्तुत गरेका थिए भने सहभागीहरु छमछम नाचेका थिए ।चापाकोटमा उत्पादित विविध परिकारको मौलिक खानाले भिन्न स्वाद दिएको थियो भने स्थानीयहरुको टीका र फूलमालासहितको आतिथ्यले कार्यक्रमलाई अविस्मरणीय बनाएको प्रतिक्रिया सहभागीहरुको रहेको थियो । कार्यक्रममा विभिन्न स्थानबाट आउनुभएका करिब १५० जनाको सहभागिता रहेको थियो ।
दुबै संस्थाका सचिव डा भानुभक्त आचार्य र शिवलाल गैरेद्वारा सहजीकरण गरिएको कार्यक्रममा कार्यक्रमको औचित्यमाथि प्रकाश पार्ने कार्य गण्डकी वाङ्मय प्रतिष्ठानका अध्यक्ष डा. वासुदेव भण्डारीले गर्नुभयो ।
उक्त संस्थाका उपाध्यक्ष लेखनाथ बस्ताकोटीले धन्यवाद ज्ञापन गर्नुभयो भने सिर्जनशील लोकतान्त्रिक प्रतिष्ठानका अध्यक्ष विष्णुप्रसाद शर्माले यस प्रकारका कार्यक्रमको निरन्तरताको शुभकामना दिँदै कार्यक्रमलाई समापन गर्नुभएको थियो ।
