काठमाडौं। सिंगापुरलाई ८ विकेटले हराउँदै घरेलु टोली नेपालले आईसीसी टी–२० विश्वकप छनोटमा शानदार यात्रा थालेको छ ।
त्रिवि क्रिकेट मैदानमा सोमबार टस जितेर ब्याटिङ थालेको सिंगापुरलाई १४५ रनमा सीमित गरेको नेपालले १६.३ ओभरमा २ विकेट गुमाएर लक्ष्य चुम्न सफल भयो ।
सुरुवाती ब्याट्सम्यान कुशल भुर्तेलले ७४ रन बनाए भने कप्तान रोहित पौडेल ३५ रनमा अविजित रहन पुगे । आसिफ शेख २७ रन बनाएर आउट भएका थिए ।
नेपालले ८४ रन जोड्दा पहिलो विकेट खसेको थियो । कुशलले ४८ बलमा २ छक्का र ८ चौका प्रहार गरेर ७४ रन बनाएर क्याच आउट हुन पुगे । त्यसअघि पहिला ब्याटिङ गरेको सिंगापुरले निर्धारित २० ओभरमा ९ विकेट गुमाएर १४५ रन जोड्न सफल भएको थियो ।
नेपालका अविनाश बोहराले ३ तथा सन्दीप लामिछाने, करन केसी र गुल्सन झाले २–२ विकेट लिएका थिए । नेपालले समूहको दोस्रो खेलमा मंगलबार मलेसियासँग प्रतिस्पर्धा गर्ने छ ।
