लियोनल मेस्सीको टिम अमेरिकी क्लब इन्टर मियामी लिग्स कप फुटबलको अन्तिम १६ बाटै आउट भएको छ । आज बुधबार बिहान भएको अन्तिम १६ को खेलमा इन्टर मियामी कोलम्बस क्रिउसँग ३–२ ले पराजित हुँदै प्रतियोगिताबाट आउट भएको हो । गत सिजन उपाधि जितेको मियामी यसपटिक अन्तिम १६ भन्दा अघि बढ्न सकेन । यो मियामीका लागि खराब नतिजा हो । टिमका कप्तान लियोनल मेस्सी चोटका कारण मैदान बाहिर भएका बेला टिम लिग्स कपको अन्तिम १६ मै पराजित भयो । मियामीलाई मेस्सीको अभाव स्पष्ट रूपमा खड्कियो । मियामीले २ गोलको अग्रता बचाउन नसक्दा स्तब्ध बन्यो ।
खेलको ६२औं मिनेटमा पुग्दा मियामीले खेल ०–२ बनाएको थियो । तर त्यसपछि कोलम्बसले लगातार ३ गोल गरेर खेलको कहानी बदल्यो । इन्टर मियामीका लागि खेलको १०औं मिनेटमा माटियास रोजासले गोल गरेर अग्रता दिलाएका थिए । ६२औं मिनेटमा डिएगो गोमेजले गोल गरेर अग्रता दोब्बर बनाएका थिए । तर यसपछि मियामीले पोस्ट बचाउन सकेन । कोलम्बसका लागि ६७औं मिनेटमा क्रिस्टिएन रामिरेजले पहिलो गोल गर्दा ६९औं मिनेटमा डिएगो रोसीले गोल गरेर खेल बराबरी बनाए । फेरि रोसी आफैंले ८०औं मिनेटमा व्यक्तिगत दोस्रो गोल गरेपछि कोलम्बसले मियामीलाई ३–२ ले पराजित गर्दै क्वार्टरफाइनलमा स्थान पक्का गर्न सफल भयो ।
